شعر باغچاسی 2

ادبی

...من هارا ؟


بو قدر درد ایچینده . درمان هارا من هارا؟ 

باختین یاتمیش چاغیندا . جانان هارا من هارا ؟


نازی اودا باغلاییب . عیشوه سی آلوولارا 

بو اود - آلوو ایچینده . سامان هارا من هارا ؟


جورو پردن ائیله ییب . جفاسی ایکی بالدان 

مهرینین گویلرینده . جوولان هارا من هارا ؟


کرمینین صداسی . بوروسده عالمی 

لوطفونون سوفره سینده . مهمان هارا من هارا؟ 


یاناق آلما دوداق گول . گردن مینا ساچ سونبول 

من حسرت قویوسوندا . بوستان هارا من هارا ؟


توراج تک قاناد آچیر . آهو تک چولده قاچیر 

ایندی چولاق قیچیملا . جیران هارا من هارا؟


کیپریگینین اوخویلا . سینه می نشان آلیب 

انصافسیزا دیین یوخ . پیکان هارا من هارا ؟


دینیمی آلیب آتیب . ایمانیما سو قاتیب 

بو آخساق ایمانیله . شیطان هارا من هارا ؟


منطقی بوروق بوروق . حکمتی باغلی یومروق 

صمد،سینیق قلمله . عرفان هارا من هارا ؟


قامت قافیه -ردیف . گوزللیگ مین مثنوی 

بیر جوت جیزما قارایلا. دیوان هارا من هارا ؟


صمد سه‌شنبه 9 تیر 1394 ساعت 20:56
10 نظر

... یوسف لر زندان ایسته ییر

دور گل لیلی لیگ ائتگینن . کونلوم بیابان ایسته ییر 

قانادلاری سینیق هدهد . یانیر سلیمان ایسته ییر


عشقین تئشتی قویولوبدور . افسانه کسگردن دوشوب 

خان آراز سارای آختاریر . مغان خان چوبان ایسته ییر 


باغ باغچانی تیکان آلیب . گولو ، یامان گونه سالیب

باغین قوروموش داماری . سو ایسته ییر، قان ایسته ییر 


عشقی کرپیج هارا چکیب ؟. دمیر آلیب دارا چکیب  

ته یرلر آلتیندا قالمیش . اورگلر درمان ایسته ییر 


کور زلیخالارین گوزو . بیرده آیدین گورسون دییه 

منصورلار دارا چکیلیر . یوسف لر زندان ایسته ییر 


گویدن هله ده نور یاغیر . مریم لر یوخا چیخیبلار !!!

تک تک مریم تاپیلسادا . ایلی رمضان ایسته ییر 


باغ باغچایا اود وورولوب . بولبوللر کوچوب گئدیرلر

تمیز سئوگی بیر دفه لیگ . گئدیر چمدان ایسته ییر 


صمد کیمی لر تاپیلیب . آغزینا نه گلیر یازیر 

قلم بابا طاهر دییه . دوشوب همدان ایسته ییر  


صمد یکشنبه 7 تیر 1394 ساعت 02:25
5 نظر

دوزوم ...


هاچاناجاق گوزومله یولونا اینجی دوزوم (چیدن)

انصافا گل انصافسیز داها قالماییب دوزوم (تحمل


هر دفه وعده واختی گلن یاز سویله ییرسن

بیردفه سویله گینن بیلیم نئچه یاز دوزوم (صبر


جافان نه قدر اولسا ؟ دایاناجام دوزه جم 

وارلیقیمین طامی سان حیات سوفره مده دوزوم (نمک


دوزو یالانی قاتیب جهننم لیگ اولموشام 

نه یالانیم کار ائدیر نه ایشه گلیر دوزوم (راست


اینانجیما سویکه نیب دئییرم گله جکدی

بیر خوشلوقوم بودور کی یولونا اینجی دوزوم (چیدن


صمد چهارشنبه 3 تیر 1394 ساعت 12:31
5 نظر

گوزوندن وام ...

جیران گلیب قاپینا . گوزوندن وام ایسته ییر 

قناری بوینون بوروب. سوزوندن وام ایسته ییر 


اولدوزلارین هئچ بیری . ضامن اولا بیلمه دی 

آی.گونشی گتیربب. اوزوندن وام ایسته ییر


یاندیرماغا. یاخماغا . اووجوندا آلوو گزیر

یای اللرین اوزادیب . کوزوندن وام ایسته ییر 


سارایلاردان پاشا . خان . توربا سالیب بوینونا 

گلیب سنین سوفره نین . دوزوندان وام ایسته ییر 


باغلاردا. باغچالاردا . سروین گوزو یولدادیر 

قدینین . قامه تینین . " دوزوندن " وام ایسته ییر 


دونیانین هر یئریندن . زوواری وار کویووین 

صمد ده داشلارینین . توزوندان وام ایسته ییر 


صمد جمعه 29 خرداد 1394 ساعت 00:18
4 نظر

26خردادهفتمین روز هجرت ابدی استاد راشید گرامی باد .

تقویم ورق خورد 

کسی که کسی بود 

                         غزل شد 

مصراع مصراع بار بست 

بیت بیت آماده سفر ...

هر چند بستگان و دوستان 

به سیل دیده 

کاسه کاسه پشت سر اش آب شدند 

دستی تکان داد و گفت:

تقویم ورق خورده را 

گر لطفی بود 

فقط بخاطر به سپارید 

به جاده امیدوارم 

ترس ام از 

تاریکی وحشت زای فراموش شدن است 

تن ام را به خاک 

نام ام را به خاطر به سپارید .

***

روح اش شاد یاد اش گرامی 

صمد دوشنبه 25 خرداد 1394 ساعت 15:46
1 نظر