... تاپمیشام

سورسوموگومه جانی . جانانه ده تاپمیشام 

دوز ، اصیل گولوشلری . دیوانه ده تاپمیشام 

کعبه ده مسجیدلرده . تاپا بیلمه دیگیمی 

ایاق قویوب صحنینه . بتخانه ده تاپمیشام 

دربارلاردا ، کاخلاردا . ایتیردیگیم گوهری 

بیر آن دونوب اوزومه . ویرانه ده تاپمیشام 

قارانلیقدا  ایللری . ظولمتی چکه چکه 

ایشقدا جان یوماقی . پروانه ده تاپمیشام 

مصلاحات توستوسونده . بوغولموش حقیقتی 

زنجیرین تسبئح ائدیب . دیوانه ده تاپمیشام

قاچیب زاهید الیندن . دوشوب ساقی ایغینا 

معرفتین   جوهرین  . پیمانه ده تاپمیشام 

ریالی  سجاده نی .  باغلاییب دوشوب یولا 

" صمد " صفا ،مردلیگی . میخانه ده تاپمیشام 

خام کباب

یاز اولسادا مئی سیز سحر . گوزلریمده شام گورونور 

سئوگی سیز آچیلان قوجاق . بر - بزگلی دام گورونور

میننتلی شکر ، بال اولسون . زهرمارداندا آجی دیر 

عشقیله وئریلن زهر . شراب دولو جام گورونور 

چک اوزوندن یایلیقینی . قوی گون چیخسین آلوو یاغسین 

سینه مده کی بو کبابین . قانی آخیر خام گورونور 

هر باخاندا مست اولورام . اوزومده هئچ بیلمیرمیشم 

اوزونده کی کیشمیش ایمیش . کاناردان بادام گورونور 

قانی توکولموش شهیده . یار کویینده آغلامایین 

جانی یار قوجاغیندادیر . جیسمیندن ناکام گورونور 

گیرمیشدیم سویود باغیندان . آلما گتیردیم گولدولر

عاغیللا باخاندا دوزدور . زیلیخا بد نام گورونور 

سینه ده عشقین دامجی سی . صمد کیچیگ گورونسه ده ؟ 

بیر طوفاندی هادیر اولون . باخمایین آرام گورونور