اوزون گونش،قاشلارین آی. ساچین گئجه گوزون اولدوز 

دونیا دوردوقجا گونشده. کولگونده دالدالاناجاق 

هرنه یه الین دییبسه؟ دونوب قیزیل مئی اولوبدور 

سن توتدوقون پیاله لر. وارلیق بو یالاناجاق 

شاعرلر هر دیلده اولسون .گوزللیگدن سوز آچاندا 

سنین آدین اورنگ اولوب. غزللرده دولاناجاق 

منیمله بیر اولاندا دا. الیم الینه چاتمادی 

حسرتیله سوردوم یاشام. بو دونیا دا اولاناجاق 

اول تام کی وار دوداغیندا . مین ایل کئچسه اولومومدن 

سنین آدین گلر. گلمز . یئنه آغزیم سولاناجاق 

قبریم اوسته سن اوزون هئچ. هر زامان آدین گلرسه؟ 

آلوو ایچینده اولسامدا؟ سینه مه گول قالاناجاق 

مئهرین قلبیمده گئدیرسه ؟ قبریم ایشقلا دولاجاق 

یئریم گولوستان اولاجاق. اسرافیل صور چالاناجاق 

بیر آن چیخارتسان یادیندان. روحومو اود بورویه جک 

دوشه جم قیر قازانینا. سن یادینا سالاناجاق 

ص. پورامان 

کاشکی

داغلارا چیخینجا ؟دئییرم کاشکی 

اوجالیب اوجالیب بیر داغ اولوردوم 

باغلارا یالواریب چیجک درینجه 

بیتیب گویه ریب باخچا باغ اولوردوم 

ه ه ه 

پریشان بیر ساچی داراماق اوچون 

دیلیم دیلیم اولوب داراق اولایدیم 

قارانلیقدا یوللار آراماق اوچون 

آیا یالوارینجا چیراق اولایدیم 

ه ه ه

قیشین شاختاسیندا ایستی گزینجه 

آلوولانیب یانیب  اوجاق اولایدیم 

آتیلمیشلارین دردیندن یازینجا 

آناسیز بیرینه قوجاق اولایدیم 

ه ه ه

فرهاددان شیریندن ایز آختارینجا  

سئوگیله دولاشیب . عشقه دولایدیم 

کتابلار آختاریب سوز آرایینجا 

سوزله نیب سوزله نیب شعیر اولایدیم 

ه ه ه

دوغرانیب دوغرانیب سیملره دونوب 

نغمه له نیب کاماندا اینله ییردیم 

سه گاهدا یانیردیم .شوشترده سونوب 

اوتوروردوم اوزومو دینله ییردیم 

ه ه ه

ص. پورامان بیله سوار

کرمانلییام زیره نی . کنعاندان آختاریرام 

دوشموشم ایش دالیجا . ایراندان آختاریرام !

گور نه قدر آرسیزام .گئدیرم حجاز دئیین 

ایمانمی قبله سی . ویراندان آختاریرام 

دوز اوچون هنده گئدیب . شکره چینه گئتدیم 

سینه مین شفاسینی . پیکاندان آختاریرام 

چوخداندی محبتی . چوخ آدامدا گورمورم 

اوز قویوموشام چوللره . حئیواندان آختاریرام 

طبیبدن اوز چئویریب . درمانی آیاغلاییب .

دردلریمین داواسین . قورباندان آختاریرام 

گور نه قدر اوزومو . اوزومده ایتیرمیشم 

ائل گولونون صافاسین . تهراندان آختاریرام 

کپورا ، آغ بالیقا . دوروب گئتدیم شیرازا 

آی منه باخ خورمانی . گرگاندان آختاریرام 

پیس گونده گرگ اولسا ؟ صمد،  آمان دونیادا 

ایکی اوزلو دوستانسا ؟ دوشماندان آختاریرام